Náðu 170 milljóna afla þrátt fyrir mótlæti

Þrátt fyrir leiðindaveður og truflanir vegna faraldursins var 20 daga túr áhafnarinnar á Blæng NK fínn að sögn skipstjórans Bjarna Ólafs Hjálmarssonar enda veiðin góð.

Fyrstitogarinn kom til hafnar á Neskaupstað í morgun með 430 tonn af blönduðum afla að verðmæti 170 milljóna króna. Mest var af ufsa, þorski og karfa auk þess sem eitthvað var um ýsu og grálúðu, að því er fram kemur í færslu á vef Síldarvinnslunnar.

„Miðað við allt og allt var þetta fínn 20 daga túr, en við vorum fimm daga frá veiðum vegna veðurs og bilunar. Við lágum til dæmis þrjá sólarhringa undir Grænuhlíð vegna veðurs og þurftum að fara inn til Hafnarfjarðar vegna bilunar. Þá fórum við tvisvar í land til að sækja menn sem voru búnir að losa sig við covid. Það gekk semsagt á ýmsu í túrnum en það er ekkert hægt að kvarta undan veiðinni á meðan við gátum verið að,“ segir Bjarni Ólafur í færslunni.

Blængur mun halda til veiða í norskri lögsögu í Barentshafi þegar líður á vikuna. Um er að ræða 40 daga túr og er gert ráð fyrir að veiða um 1.300 tonn.

• Blogga um frétt