Fulltrúar norsku strandgæslunnar, lögreglunnar og tollstjóra fóru um borð í rússneska lúxussnekkju á miðvikudag er hún lá við bryggju í Norður-Noregi. Snekkjan Ragnar hefur verið í höfninni í Narvík frá því á fimmtudag í síðustu viku og er í eigu Vladimir Strzhalkovskí, fyrrverandi fulltrúa KGB og náins vinar Vladimírs Pútíns Rússlandsforseta.

Snekkjan vakti töluverða athygli hér á landi síðasta sumar er hún sótti Ísland heim og er um að ræða breyttan ísbrjót. Útlit snekkjunnar er sagt tengjast áhuga eigandans á átökum miðalda og vopnum þess tíma og á yfirbyggingin að svipa til hjálms.

Frétt af mbl.is

Lúxussnekkja og fyrrum ísbrjótur í Eyjafirði

Ekki hefur fengist upplýst hvers vegna fjölmennt lið á vegum norskra yfirvalda fór um borð. Mari Lillestø, aðgerðarstjóri lögreglunnar í lögreglumdæmi Norðlandi, kvaðst í samtali við norska dagblaðið VG ekki vita hvert tilefni aðgerðarinnar hafi verið og vísar á útlendingadeild norsku lögreglunnar sem ekki svarar fyrirspurnum blaðsins.

Þá segir talsmaður norska hersins, Elisabeth Eikeland majór, að strandgæslan hafi veitt lögreglu aðstoð og að málið sé á þeirra höndum.

Lúxussnekkjan Ragnar. mbl.is/Þorgeir Baldursson

Mögulega vegna njósna

Ola Kaldager, fyrrverandi yfirmaður norsku leyniþjónustunnar, segir í samtali við norska ríkisútvarpið NRK algengt að rússnesk sjóför komi til Norður Noregs þegar stórar NATO-æfingar fara fram. Til stendur að halda stærstu NATO-æfingu síðari tíma undir merkjum Cold Response í mars og apríl og taka um 35 þúsund hermenn frá 28 ríkjum þátt.

Þá segir Kaldager tilgang komu rússnesku sjófarana vera að afla tæknilegar upplýsingar, eignast uppljóstrara og hlera fjarskipti.

Í þessu samhengi vekur athygli að snekkjan Ragnar er ekki einungis búin til ferða í gegnum allt að 50 sentimetra þykkan ís, heldur er hún einnig búin þyrlupalli ásamt plássi fyrir könnunarkafbát, rib-bát, tvær sæþotur og brynvarið ökutæki af gerðinni Ripsaw EV2.

Ragnar er 68,2 metra að lengd, með 8 lúkara og er hámarkshraðinn 14 hnútar. Snekkjan hefur undanfarið verið auglýst til sölu og er ásett verð 69,5 milljónir evra sem er jafnvirði 9,8 milljarða íslenskra króna.

Tengdar fréttir

Úkraína

Trump segir Rússa mega búast við frekari aðgerðum

• Fjórir féllu í árás Rússa á Kænugarð
• Rússar sagðir hafa ætlað að ráðast á flugfélög
• Umfangsmesta loftárás Úkraínumanna til þessa
• Vill senda úkraínska slökkviliðsmenn til LA

» Fleiri tengdar fréttir

Rússland

Rússneskt herskip gripið við njósnir við Bretland

• Fjórir féllu í árás Rússa á Kænugarð
• Rússar sagðir hafa ætlað að ráðast á flugfélög
• Umfangsmesta loftárás Úkraínumanna til þessa
• Hvetja fólk til að ganga í herinn

» Fleiri tengdar fréttir

• Blogga um frétt