Síldarvinnslan á útistandandi viðskiptakröfur í Úkraínu að verðmæti 9 milljóna bandaríkjadala, jafnvirði 1.144 milljóna íslenskra króna, og ríkir nú töluverð óvissa þar sem Úkraína hefur verið meðal mikilvægustu viðskiptalöndum fyrirtækisins.

Í pistli á vef Síldarvinnslunnar skrifar Gunnþór Ingvason, framkvæmdastjóri útgerðarinnar, að á síðustu árum hefur Úkraína verið áfangastaður þriðjungs frosinna uppsjávarafurða fyrirtækisins, en þangað er selt töluvert af síld, makríl og loðnu. Vægi Úkraínu var enn meira 2019 og 2020 þegar var loðnubrestur.

Gengi hlutabréfa Síldarvinnslunnar hafa lækkað mest það sem af er degi, um 5,6% þegar þetta er ritað, en gengi bréfa annarra hafa einnig lækkað.

Frétt af mbl.is

Sjávarútvegurinn lækkar skarpt í Kauphöllinni

„Stríðsátökin í Úkraínu eru okkur öllum mikil harmtíðindi og er hugur okkar hjá fólkinu þar. Öll fordæmum við þær gegndarlausu árásir sem úkraínska þjóðin er að verða fyrir. […] Við höfum átt í umfangsmiklum viðskiptum þar í landi til margra ára og byggt þar upp gott og traust viðskiptasamband. Við eigum góða viðskiptavini þar og er hugur okkar hjá þeim og þeirra fólki,“ skrifar Gunnþór.

Skipi var snúið við

Hann segir mikla óvissu um þróun úkraínska markaðarins. „Stjórnendur Síldarvinnslunnar fylgjast náið með ástandinu og þróun mála þar í landi. Tekið skal fram að eitt fyrsta verkefni félagsins, eftir að fregnir bárust af átökunum, var að snúa við skipi sem var á leið til Odessa. Þær vörur verða fluttar aftur til Íslands á meðan staðan verður metin.“

Þá hafi verið framleitt töluvert af loðnu sem selja átti til Úkraínu og er fyrirtækið nú með töluvert af birgðum.

„Eins og sakir standa er of snemmt að draga skýrar ályktanir um möguleg áhrif ástandsins á viðskipti Síldarvinnslunnar í Úkraínu. Að sama skapi, í ljósi þess óvissuástands sem uppi er, er ekki unnt á þessu stigi málsins að leggja mat á möguleg áhrif ástandsins á afkomu félagsins,“ skrifar Gunnþór að lokum.

Tengdar fréttir

Úkraína

Rússar verja milljörðum til að efla herinn

• Danir styðja vopnaframleiðslu um 27 milljarða
• Sex létust í árás á sjúkrahús
• Gagnrýna kjarnorkuhótarnir Pútíns harðlega
• Selenskí: Pútín hyggst ráðast á kjarnorkuver

» Fleiri tengdar fréttir

Síldarvinnslan

Fjölnir til Noregs

• Kaup Síldarvinnslunnar ganga til baka
• Sjóvá og Síldarvinnslan áfram í samstarfi
• Samfélagsspor Síldarvinnslunnar yfir 10 milljarðar
• Þorsteinn Már skaut föstum skotum á SKE

» Fleiri tengdar fréttir

• Blogga um frétt