Muninn hafi sokkið vegna veðurs og ísingar

Talið er að fóðurpramminn Muninn hafi sokkið vegna vonds veðurs og ísingar í Reyðarfirði fyrir rúmu ári. Rannsóknarnefnd samgönguslysa, siglingasvið, afgreiddi lokaskýrslu um málið 18. febrúar og var ekki ályktað í málinu. Nefndin mun hins vegar fylgjast með þegar flakið verður tekið upp og taka málið þá upp að nýju ef ástæða þykir til.

Frétt af mbl.is

Fóðurprammi sökk í Reyðarfirði

Þegar Muninn sökk var hann mannlaus og festur með átta akkerum sem lágu u.þ.b. 20-25 metra út frá honum. Í ljós kom að pramminn stóð upp á endann á botninum með stýrishúsið niður og voru tvö akkeri föst í honum að aftan. Tvö göt og aðrar skemmdir voru sjáanlegar á botni prammans bakborðsmegin.

Síðdegis 9. janúar fór vindur í um 20 metra á Kollaleiru í Reyðarfirði og í mestu hviðum í yfir 34 metra um kvöldið og var umtalsverð ísing. Fram kom hjá hafnaryfirvöldum að um kvöldið 9. janúar hefði verið kominn einhver halli á Munin og hann sokkið undir morgun á sunnudegi.

Í bígerð var að taka Munin upp á yfirborðið í júlí 2021 en ákveðið að fresta því þar sem það var talið of áhættusamt vegna mögulegra skemmda á akkerisfestum kvía nálægt flakinu. Einnig var talin þörf á að dæla fóðri úr nokkrum fóðursílóum til að létta flakið en vegna eldisfisks í nálægum kvíum var slík aðgerð metin óásættanleg. Ákveðið var að bíða með upptöku flaksins þar til eldislotu væri lokið haustið 2022.

Samkvæmt upplýsingum útgerðar er Muninn ekki flokkaður sem skip heldur fóðurprammi og því ekki skráningarskyldur. Starfsmenn fyrirtækisins sjái um eftirlit með fóðurprömmum í samræmi við verklagsreglur þess og framleiðenda hans. Engin mengun hefur borist frá prammanum vegna atviksins. Samkvæmt upplýsingum útgerðar voru 10 rúmmetrar af díselolíu í prammanum, en samkvæmt upplýsingum björgunaraðila var 18 rúmmetrum af díselolíu dælt úr flakinu.

Frétt af mbl.is

Vel gekk að dæla olíu úr prammanum í Reyðarfirði