Loðnuafli fékkst á tveimur veiðisvæðum um helgina og var langt á milli þeirra. Annars vegar fékkst afli í mynni Ísafjarðardjúps og hins vegar í Fjallasjó undan Eyjafjöllum. Í gær var lítið að frétta og einhver skipanna sem höfðu reynt fyrir sér í grennd við Eyjar héldu á vestursvæðið þar sem reiknað var með skaplegra veðri í dag.

Guðmundur J. Óskarsson, sviðsstjóri uppsjávarsviðs Hafrannsóknastofnunar, segir það merkilegt að hrygningarloðna veiðist út af Ísafjarðardjúpi. Með öðrum orðum þýddi það að loðnan hefði nánast gengið hringinn í kringum landið. Engar upplýsingar væru um vestangöngu.

Guðmudnur Óskarsson, sviðsstjóri uppsjávarsviðs Hafrannsóknastofnunar mbl.is/Kristinn Magnússon

Hann sagðist ekki trúaður á að loðnan hrygndi inni á Ísafjarðardjúpi, en hins vegar væru þekktir hrygningablettir út af sunnanverðum Vestfjörðum og Látrabjargi, þar sem afli fékkst í síðustu viku. Loðnan hrygnir á malarbotni þar sem eru straumar og hreyfing á sjónum. Guðmundur sagði ekki óvænt að loðnu væri að finna á fleiri en einum stað. Á vertíðinni hefði verið talað um töluverða dreifingu og þegar fyrsta ganga hefði verið komin suðaustur fyrir land hefði Hafrannsóknastofnun mælt loðnu fyrir norðaustan og norðan land.

Stendur djúpt og er gisin

Grænlenska skipið Polar Ammassak kom um helgina með 1.900 tonn af hrognaloðnu til Neskaupstaðar. Á vef Síldarvinnslunnar er að finna eftirfarandi lýsingu Geirs Zoëga skipstjóra á túrnum:

„Við byrjuðum að veiða vestur af Bjargtöngum og fengum þar um 700 tonn. Síðan var haldið inn á Breiðafjörð og þar fengust 600 tonn í tveimur köstum. Við kláruðum síðan í Nesdýpinu vestur af Vestfjörðum. Loðnan hegðar sér undarlega og gerir okkur erfitt fyrir. Hún bæði stendur djúpt og er gisin. Svo er rosalega mikið af hval á miðunum og hann skapar heilmikil vandræði.“

Tengdar fréttir

Loðnuveiðar

Kaupa norska loðnu á uppboði

• Árangurslausri loðnuleit formlega lokið
• Ekkert markvert fundist af loðnu
• Heimaey bættist í hóp leitarskipa
• Tvö skip leita nú loðnu suðaustur af landinu

» Fleiri tengdar fréttir