Minna sjómenn á að sleppa hlýra

Fiskistofa vekur athygli á mikilvægi þess að sleppa lífvænlegum hlýra í tilkynningu á vef stofnunarinnar. Hlýrastofninn við Ísland hefur verið í sögulegu lágmarki og hefur hann verið á undanhaldi allt frá árinu 1996.

Samkvæmt aflaupplýsingum á vef stofnunar hefur frá upphafi fiskveiðiársins 1. september 2021 þar til dagsins í dag verið landað rétt rúmu 571 tonni af hlýra en það er 194 tonn umfram ráðgjöf Hafrannsóknastofnunar.

„Hlýri er tegund sem á undir högg að sækja, stofninn er lítill og var hlýrinn af þeim sökum settur í aflamark,  til að koma í veg fyrir ofveiði á honum. Því er afar mikilvægt að útgerðir nýti heimild til sleppingar lífvænlegs hlýra og skrái í afladagbók,“ segir í tilkynningu Fiskistofu.

Sammála um að heimila sleppingar

Í kjölfar fundar sérfræðinga Hafrannsóknastofnunar og útgerðarmanna árið 2020 var ákveðið að leita heimildar til að sleppa lífvænlegum hlýra og fékkst sú heimild 14. desember sama ár.

Takmarkaðar rannsóknir voru þá til á lífslíkum hlýra eftir sleppingu en Hafrannsóknastofnun hafði vakið athygli á að að frumathugun hennar hafi sýnt að „hlýri sem veiddur var í botnvörpu virtist þola 1-2 tíma í móttöku eða á færibandi áður en honum var sleppt.“ Þá voru gerðar áætlanir um frekari rannsóknir á þessu sviði og voru meðal annars hafnar rannsóknir á lífslíkum hlýra eftir línuveiðar.

Frétt af mbl.is

Sjómenn hvattir til að sleppa hlýra

• Blogga um frétt