Grásleppuveiðar hefjast á sunnudag og eru blendnar tilfinningar meðal grásleppusjómanna gagnvart vertíð ársins enda mikil óvissa um verð og hefur Landssamband smábátaeigenda (LS) óskað eftir því að heimilt verði að fleygja hveljunni og hirða aðeins hrognin.

Endanleg ráðgjöf Hafrannsóknastofnunar vegna vertíðarinnar liggur ekki fyrir en ráðlagt upphafsaflamark í grásleppu á fiskveiðiárinu er 3.174 tonn. Í fyrra nam ráðlagt heildaraflamark 9.040 tonnum en í byrjun þeirrar vertíðar var upphafsaflamark 1.634 tonn. Sé breyting á upphafsaflamarki milli ára einhver vísbending gætu útgefnar veiðiheimildir verið miklar.

„Í fyrra var mokveiði en færri stunduðu veiðarnar en árið 2020. Helsta ástæðan var verðhrun, verð sem í boði var freistaði ekki. Margir þeirra sem létu sig hafa það sögðust auka veiðina um 100%, þannig gætu þeir réttlætt að taka þátt í vertíðinni. Sú mikla veiði sem vertíðin skilaði – rúmar 14 þúsund tunnur – svarar markaðurinn nú með áhugaleysi fyrir kaupum og hvað þá að verðhækkun sé í kortunum,“ svarar Örn Pálsson, framkvæmdastjóri LS, spurður um komandi vertíð.

Þekktur vandi

Örn segir jafnframt „afar litlar líkur á að hægt verði að selja frosna grásleppu til Kína og hefur LS af þeim sökum óskað eftir undanþágu að skylt verði að koma með grásleppuna í land.“

Sala frystra grásleppuhvelja hefur reynst erfið og voru tugir gáma óseldir við upphaf vertíðar á síðasta ári. Þá hefur einnig reynst erfitt að koma grásleppunni í bræðslu þar sem slíkt telst of kostnaðarsamt.

Frétt af mbl.is

Tugir gáma af hveljum óseldir

Tengdar fréttir

Grásleppuveiðar

Sakar Þórarin Inga um brot á siðareglum

• Álag á starfsfólki vegna grásleppukvóta
• Þó nokkur munur á kvóta og fjölda báta
• Þrjár útgerðir umfram hámark í grásleppu
• Yfir 100 skip fá ekki grásleppukvóta

» Fleiri tengdar fréttir