Halda sögustund um sögu íslenskra sjókvenna

Félag kvenna í sjávarútvegi (KIS), Innviðaráðuneytið og Sjávarklasinn halda sögustund um íslenskar sjókonur í mathöllinni á Granda í Reykjavík á morgun.

Þar mun Margaret Willson, mannfræðingur og aðstoðarprófessor við Washington háskóla, fræða gesti um sögu íslenskra sjókvenna sem réru til sjós og stýrðu sínum knerri frá landnámi og fram á 19. öld. Þá hófst vélvæðing báta en um leið hurfu konur af sjó.

„Sjaldan er getið þessarra kvenna í söguheimildum en konur voru mikilvægur hlekkur í að afla sér og sínum lífsviðurværis úr matarkistu hafsins. Þrátt fyrir aldalanga sögu íslenskra sjókvenna hallar verulega á hlut þeirra á sjó. Nægir að nefna að aðeins 0,3% þeirra sem lokið hafa vélstjórnarnámi eru konur og 1% þeirra sem lokið hafa námi í skipstjórn,“ segir í kynningu sögustundarinnar á vef KIS.

Árið 2016 gaf Willson út bókina „Seawomen of Iceland“ (Sjókonur Íslands).

• Blogga um frétt