Kauptilboð samþykkt í Tý og Ægi

Kauptilboð hefur verið samþykkt í varðskipin Tý og Ægi og fara þau því úr eigu ríkisins á næstunni. Bæði skipin verða seld einum kaupanda, sem er íslenskur. Þetta staðfestir Helena Rós Sigmarsdóttir, lögfræðingur hjá Ríkiskaupum, í samtali við Morgunblaðið. Kauptilboðið er bindandi og vænta má að drög að kaupsamningi séu komin langt á veg. Kaupverðið hefur ekki enn verið gefið upp, en verður gefið upp þegar endanlegir samningar liggja fyrir.

Frétt af mbl.is

Lægsta boð 18 milljónir fyrir tvö varðskip

Tvö tilboð bárust

Í byrjun febrúar sl., þá eftir auglýsingafrest, greindi Morgunblaðið frá því að hæsta tilboð væri 125 millj. kr. Tvö tilboð hefðu borist. Hið lægra hefði verið upp á tæpar 18 millj. kr. „Verið er að leggja mat á áframhaldandi samningsgrundvöll við hæstbjóðanda,“ sagði í svari Ríkiskaupa í febrúar síðastliðnum. Helena segir aðspurð að fleiri tilboð hafi ekki borist eftir auglýsingafrestinn.

Nánar má lesa um málið í Morgunblaðinu í dag.