Samkomulag um starfslok eftir erfitt mál

Skipstjóri Herjólfs, sem var uppvís að því fyrr á árinu að sigla án atvinnuréttinda, og Herjólfur ohf. hafa komist að samkomulagi um starfslok. Þetta staðfestir Hörður Orri Grettisson, framkvæmdastjóri Herjólfs.

Fjallað var um það fyrr á árinu að skipstjóri hjá Herjólfi hefði fengið áminningu í starfi og í kjölfarið lækkaður í tign eftir að upp komst að hann hefði haldið áfram að sigla skipinu eftir að siglingarréttindi hans runnu út.  

Frétt af mbl.is

Sigldi eftir að réttindin runnu út

Erfitt mál, segir Hörður

Í samtali mbl.is við Hörð í janúar kom fram að skipstjóranum hefði verið veitt annað tækifæri og að honum væri gefið færi á að endurvinna það traust sem hann hafði tapað. Voru atvinnuréttindi skipstjórans í kjölfarið endurnýjuð. 

Frétt af mbl.is

Mál skipstjóra litið alvarlegum augum

Skipstjórinn og Herjólfur ohf. komust aftur á móti að samkomulagi um starfslok sem voru tilkynnt starfsmönnum í gær. Spurður að því hvers vegna til starfsloka hafi komið núna en ekki um leið og málið komst í ljós sagðist Hörður ekki vilja tjá sig um það en sagði þó að um væri að ræða erfitt mál.  

Að sögn Harðar hefur félagið skerpt á verklagsreglum sem voru þegar til staðar en hafi ekki reynst nægilega góðar. Reiknar Hörður með því að þetta endurtaki sig ekki aftur. 

• Blogga um frétt