Leituðu að veiðibát með sex innanborðs

Töluverður viðbúnaður var hjá Landhelgisgæslu og björgunarsveitum á norðanverðum Vestfjörðum síðdegis í dag vegna frístundaveiðibáts sem ekki náðist sambandi við. Sex voru um borð í bátnum.

Þetta kemur fram í tilkynningu frá Landhelgisgæslunni.

Samband rofnaði við bátinn á fjórða tímanum þegar hann var í mynni Önundarfjarðar og hófu varðstjórar í stjórnstöð Landhelgisgæslunnar þegar eftirgrennslan sem ekki bar árangur.

Þá var áhöfn þyrlu Landhelgisgæslunnar kölluð út sem og sjóbjörgunarsveitir á norðanverðum Vestfjörðum. Að auki voru skip og bátar í grenndinni beðnir um að halda á staðinn og svipast um eftir bátnum.

Klukkan 17:45 náðist loks samband við bátinn þegar hann var á siglingu inn Önundarfjörð og var þá viðbragð þyrlusveitar og björgunarsveitar afturkallað.

• Blogga um frétt