„Héðan er allt gott að frétta. Hér er fínasta veiði. Við erum núna komnir með yfir 2.000 tonn í fjórum holum og erum nú á okkar fimmta holi í túrnum,“ segir Tómas Kárason, skipstjóri á Beiti NK, um gang kolmunnaveiða á gráa svæðinu suður af Færeyjum í færslu á vef Síldarvinnslunnar.

„Síðasti sólarhringur var mjög góður en þá fengum við hátt í 1.800 tonn í þremur holum. Í fyrrinótt fengum við 620 tonn, um 600 tonn um hádegi í gær og 540 tonn í nótt. Þetta voru allt stutt hol eða frá sex og upp í níu tíma. Stundum er dregið mun lengur eða allt upp í 16 tíma. Þetta er fínasti fiskur sem fæst hérna, þessi dæmigerði göngufiskur,“ segir Tómas.

Hann segir skipið vera á Wyville Thompson-hrygg og að þar séu flest kolmunnaskipin um þessar mundir en einnig eru einhverjir norðar. „Það verður að segjast að þetta lítur býsna vel út núna og menn eru kátir hér um borð.“

Fram kemur í færslunni að Börkur NK sé einnig á miðunum og að veiðar hafi gengið vel. Bjarni Ólafsson AK landaði í Neskaupstað í gær og er á leiðinni á miðin, en Hákon EA kom til hafnar í Neskaupstað í nótt og er unnið að löndun. Vilhelm Þorsteinsson EA, sem Samherji gerir út, er á leiðinni þangað með fullfermi af kolmunna.

Tengdar fréttir

Síldarvinnslan

Unnu úr 247 þúsund tonnum

• Jólasíld ársins í fötur
• Samherji tekur Birting á leigu
• Fjölnir til Noregs
• Kaup Síldarvinnslunnar ganga til baka

» Fleiri tengdar fréttir

• Blogga um frétt