Samherji hefur keypt frystitogarann Akraberg FO af Framherja í Færeyjum, sem Samherji á þriðjungshlut í. Skipið var smíðað 1994 í Noregi fyrir Hrönn hf. á Ísafirði og hét upphaflega Guðbjörg ÍS.

„Við ætlum að nota skipið til að veiða grálúðu í íslensku lögsögunni,“ sagði Kristján Vilhelmsson útgerðarstjóri Samherja. Grálúðan verður hausuð, sporðskorin og heilfryst um borð. Skipið er væntanlegt í næsta mánuði. Það mun fá nafnið Snæfell og heimahöfn þess verður á Akureyri. Það verður hrein viðbót við flota Samherja og reiknar Kristján með að 18 menn verði í áhöfn. Hann sagði að skipinu hefði verið vel viðhaldið og alltaf fiskað vel.

Hrönn hf. rann inn í Samherja 1997 sem þá eignaðist togarann. Hann var seldur til Þýskalands og hét þá Hannover NC. Skipið kom aftur í flota Samherja 2002, var lengt um tæpa 18 metra, breytt í fjölveiðiskip og fékk nafnið Baldvin Þorsteinsson EA. Það fór aftur til Þýskalands 2007. Framherji keypti skipið 2013 og hefur gert út síðan. Framherji fær nýjan togara í næsta mánuði og þess vegna var Akrabergið selt.

Tengdar fréttir

Samherji

Ekki sérstakt markmið að vera efst

• „Ég er á margan hátt nokkuð bjartsýnn“
• Skipin í höfn og komin í sparifötin
• Hæstiréttur hafnar kröfu Þorsteins Más
• Samherji hafði betur gegn Odee

» Fleiri tengdar fréttir