Þorskur úr Barentshafi aldrei verðmætari

Á veiðitímabili Barentshafsþorsks við Norður-Noreg, sem Norðmenn nefna skrei, fengust að meðaltali 53,4 norskar krónur fyrir hvert útflutt kíló, jafnvirði um 740 íslenskra króna. Fram kemur á vef markaðsráðs sjávarafurða, Norges Sjømatråd, að fyrra met hafi verið frá 2020 þegar meðalverð á kíló nam 47,9 norskum krónum.

Á veiðitímabilinu í fyrra, sem er frá janúar til apríl, fengust að meðaltali 42 norskar krónur á kíló jókst því útflutningsverðmæti skrei um 28% milli ára.

Helstu kaupendur skrei eru Spánverjar, Þjóðverjar og Frakkar. „Spánverjar þrá skrei og byrja að biðja um hann löngu áður en vertíðin hefst,“ er haft eftir Jose Luis Bañeros, hjá spænska félaginu Arte Morhua sem flytur til Spánar um 600 tonn af þessari gerð af þorski á hverju ári. Bañeros segir Spánverja reiðubúna til að greiða hátt verð og að nú hafi fengist 9,5 evrur fyrir hvert kíló, 1.327 íslenskar krónur, í verslunum þar syðra en í fyrra voru evrurnar 8,5.

„Þegar hráefnið verður dýrara verðum við að selja fyrir hærra verð. Viðskiptavinir taka eftir þessu en eftirspurnin er góð og fólk vill þorsk þó hann kosti meira,“ segir Frode Eliassen, sölustjóri Norfra. Fyrritækið selur aðallega skrei til Spánar og Frakklands.

Frode Eliassen, sölustjóri Norfra, hittir viðskiptavini á sjávarútvegssýningunni í Barselóna. Ljósmynd/Norges Sjømatråd

25% aukning útflutningsverðmæta

Fyrstu fjóra mánuði ársins fluttu Norðmenn út 4.600 tonn af ferskum skrei að verðmæti 243 milljónum norskra króna, jafnvirði um 3,3 milljarða íslenskra króna. Um er að ræða 2% minna magn en í fyrra á móti 25% aukningu í útflutningsverðmætum.

Skrei er í raun atlantshafsþorskur sem norskir sölumenn segja hafi betra bragð og er fíngerðari en aðrir þorskstofnar. Hvað sé til í þessum fullyrðingum Norðmanna skal ósagt en ljóst er að þetta er þorskur sem er alla jafna á norðlægum slóðum á Barentshafi og gengur árlega að hrygningarstöðvum við Noregsstrendur. Fiskurinn er helst veiddur á línu og er vertíðin einna stærst við Lófót-eyjaklasan.

• Blogga um frétt