Síldarvinnslan selur töluvert af uppsjávarafurðum til Úkraínu, þrátt fyrir stríðsátökin. Afurðirnar fara í gegnum hafnarborgina Klapeida í Litháen. Áður var siglt með afurðir til úkraínsku hafnarborgarinnar Odessu við Svartahaf. Önnur af tveimur verksmiðjum stærsta kaupandans er enn starfrækt en hin er á hernumdu svæði.

Þetta er meðal þess sem fram kemur í færslu á vef Síldarvinnslunnar um sölu afurða til Úkraínu.

Þar segir að Síldarvinnslan hafi ekki einvörðungu selt uppsjávarfisk til Úkraínu í gegnum tíðina, heldur hafi einnig verið seld þangað bleikja í vaxandi mæli. Sölufélagið Ice Fresh Seafood hefur annast sölu á fiski frá Síldarvinnslunni til Úkraínu og er stærsti kaupandinn Ukranian Fish Company (UFC).

UFC er sagt hafa keypt mikið magn af makríl, síld og loðnu sem hafi verið unnin fyrir þarlenda neytendur í tveimur verksmiðjum fyrirtækisins. Forstjóri UFC, Oleg Luschyk, rekur einnig fiskverslanir undir heitinu Don Mape og veitingastaði sem bjóða upp á sjávarfang af ýmsu tagi.

Oleg Luschyk framan við eina af verslunum Don Mape-keðjunnar. Ljósmynd/Síldarvinnslan

Þúsundir tonna af fiski

Önnur þeirra tveggja verksmiðja sem UFC starfrækir er staðsett í Kubiansk í austurhluta Úkraínu sem Rússar náðu á vald sitt, skömmu eftir að þeir réðust inn í landið. Þar er nú engin framleiðsla en þegar stríðið hófst, voru þúsundir tonna af fiski í frystigeymslum verksmiðjunnar.

Aðalverksmiðja UFC er hins vegar staðsett í Kænugarði. Hún var fyrst tekin í notkun árið 2017. Þar voru 7.000 tonn af fiski í frystigeymslu þegar hún var sprengd í loft upp, eftir að stríðið skall á. Þetta er haft eftir Gústafi Baldvinssyni, framkvæmdastjóra Ice Fresh Seafood, í færslunni.

„Annar kúnni, sem við seljum fisk, er með myndarlega verksmiðju í Lviv. Sú verksmiðja starfar með nánast fullum afköstum. Auðvitað eiga þessi fyrirtæki í miklum vanda og óvissan er mikil en þau hafa meðal annars gefið mikið af matvælum, bæði til almennings og úkraínska hersins á þessum síðustu og verstu tímum,“ segir hann.

Ukranian Fish Company (UFC) hefur rekið tvær stórar verksmiðjur sem meðal annars vinna íslenskan fisk fyrir neytendamarkað. Ljósmynd/Síldarvinnslan

Tengdar fréttir

Úkraína

Orban í óvæntri heimsókn til Pútíns

• „Stríð eru alltaf óréttlát“
• Tekur ummæli Trumps um stríðslok alvarlega
• „Áfall fyrir bæjarfélagið“
• Selenskí krefst svara frá Trump

» Fleiri tengdar fréttir

• Blogga um frétt