Gullbergið komið til Eyja

Nýtt skip Vinnslustöðvarinnar (VSV), sem mun fá nafnið Gullberg VE-292, kom til heimahafnar í Eyjum í morgun. Skipið kom hingað frá Noregi, þaðan sem það var keypt og ber enn nafnið Hörður. Nú verður skipinu komið á íslenska skipaskrá og sýnt heimamönnum síðar í vikunni, að því er fram kemur á Eyjafréttum. Er þetta fjórða uppsjávarskipið í eigu VSV.

Skipstjóri á Gullberginu er Jón Atli Gunnarsson, sem áður var í brúnni á Kap VE. Skipið er 70 metra langt og 13 metra breitt. Vél skipsins er ný og búið að yfirfara ýmsan búnað um borð, eins og kælikerfi og lestar.

Á vef Eyjafrétta er vitnað í Sigurgeir Brynjar Kristgeirsson, framkvæmdastjóra Vinnslustöðvarinnar, sem lýsir mikilli ánægju með skipið. Var hann mættur á bryggjuna í morgun að taka á móti skipinu, ásamt fleiri starfsmönnum fyrirtækisins og heimamönnum.

 „Þetta er öflugt og gott skip og kemur sér vel á makrílnum í sumar. Það  eru allar líkur á að makríllinn verði fyrir austan eins og í fyrra og þá er gott að  vera með fjögur skip,“ sagði Binni við Eyjafréttir.

Heimamenn biðu spenntir á bryggjunni í Eyjum að taka á móti nýja skipinu. Sigurgeir Brynjar hjá Vinnslustöðinni, Binni, er annar frá hægri. Mbl.is/Óskar Pétur Friðriksson

Jón Atli Gunnarsson er skipstjóri um borð í Gullberginu VE, sem senn fer á makrílveiðar fyrir Vinnslustöðina í Eyjum. Mbl.is/Óskar Pétur Friðriksson

• Blogga um frétt