Slippurinn Akureyri kaupir vélsmiðju Martaks í Grindavík

Slippurinn Akureyri ehf. hefur keypt fasteignir, vélar og tæki Martaks í Grindavík. Með kaupunum flytjast tíu starfsmenn Martaks til Slippsins frá og með mánaðarmótunum. Aðrir starfsmenn Martaks fylgja félaginu til áframhaldandi rekstrar. Frá þessu er greint í tilkynningu frá Slippnum.

Með þessu verður Slippurinn með starfsstöð á Reykjanesi, en fram kemur í tilkynningunni að mikilvægt hafi verið fyrir félagið að geta veitt viðskiptavinum á suðvestur horni landsins aukna þjónustu, auk þess sem staðsetning í Grindavík sé ákjósanleg vegna þjónustu við fiskeldi.

Martak hefur frá stofnun þess, fyrir tæpum fjörutíu árum unnið á sviði tæknilausna og þjónustu fyrir rækjuiðnaðinn en hefur síðustu ár í auknum mæli sinnt sambærilegum verkefnum fyrir fiskiðnaðinn. Fyrirtækið er með starfstöðvar á Íslandi og Kanada og mun þaðan sinna núverandi og nýjum viðskiptavinum. Þá hefur félagið boðið upp á heildstæðar lausnir til hreinsunar á frárennsli fyrirtækja og sveitarfélaga. 

Slippurinn hefur boðið heildarlausnir í hönnun, þróun og endurnýjun á skipum og búnaði þeirra, auk þess sem svonefndum landverkefnum hefur fjölgað á undanförnum árum.

Segir í tilkynningunni að Slippurinn muni með þessu leitast við að þjónusta núverandi fiskeldisfyrirtæki á svæðinu auk þess að koma að nýsmíðum og þjónustu við þá uppbyggingu sem á sér stað á svæðinu.

• Blogga um frétt