Nýr 125 tonna krani kominn til Sundahafnar

Nýr rafdrifinn gámakrani sem Eimskip hyggst taka í notkun í Sundahöfn kom til landsins um helgina. Kraninn, sem fengið hefur nafnið Alda, vegur 125 tonn, er færanlegur og með 54 metra bómu sem getur þjónustað stærri skip en eldri kranar. Þá er stýrishús kranans einnig hærra sem bætir útsýni kranastjóra.

Þetta kemur fram í tilkynningu á vef Eimskips. Þar segir jafnframt að kraninn sé af gerðinni Gottwald og er sá tíundi af þeirri gerð sem félagið eignast, en Eimskip er með nýja krananum með 11 krana í rekstri.

Alda muni leysa af hólmi kranann Gretti, en lokið var við rafvæðingu hans ásamt kranans á síðasta ári samhliða rafvæðingu kranans Storms.

Frétt af mbl.is

Allir kranar Eimskips nú rafknúnir

Grettir verður hins vegar ekki tekin úr rekstri heldur verður hann fluttur til Þórshafnar í Færeyjum og mun hann þjónusta skip Eimskips þar. „Koma Grettis til Þórshafnar fjölgar gámakrönum þar í þrjá, sem mun auka rekstraröryggi og lyftigetu hafnarinnar,“ segir í tilkynningunni.

„Eitt stærsta sjálfbærniverkefni Eimskips er að minnka losun gróðurhúsalofttegunda en félagið hefur sett sér metnaðarfullt markmið varðandi það. Verkefni tengd gróðurhúsalosun eru beintengd heimsmarkmiði Sameinuðu þjóðanna sem fjallar um aðgerðir í loftlagsmálum en félagið leggur einmitt áherslu á það markmið. Alls eru 4 gámakranar á hafnarsvæðinu í Reykjavík, Jakinn, Straumur, Stormur og Alda, sem eiga það jafnframt sameiginlegt nota rafmagn í stað jarðefnaeldsneytis,“ segir að lokum.

Nýr rafknúinn krani Eimskips kemur til Sundahafnar. Ljósmynd/Eimskip

• Blogga um frétt