„Það vita allir að þjóðhátíðartíminn er heilagur“

Annað kvöld verður síðasta löndun ísfisktogarans Bergs VE áður en hlé er gert á veiðum fram yfir verslunarmannahelgi, eða það sem Eyjamenn kalla þjóðhátíðarstopp. „Það vita það allir að þjóðhátíðartíminn er heilagur tími hjá Vestmanneyingum og þá er þar enginn á sjó,“ segir Jón Valgeirsson, skipstjóri á Bergi, í færslu á vef Síldarvinnslunnar.

Bergur landaði 60 tonnum af karfa í gær eftir stutta veiðiferð. „Við fengum karfann í Skerjadýpinu. Héldum til veiða á fimmtudag og vorum í reynd að veiðum í um tvo sólarhringa. Það var þokkalegasta veður og svo sem ekki yfir neinu að kvarta. Nú er verið að skrapa ýmislegt upp í lok kvótaárs og við þurftum að sækja karfa.“

Ekki er sjálfgefið að allir séu á veiðum um þessar mundir enda eru aðeins 6,7% af þorskkvótanum óveiddur, 0,6% af ýsukvótanum og 5,5% af karfakvótanum.

„Við erum vel settir að hafa verkefni því sumir eru hreinlega stopp núna. Við fórum strax út eftir löndun í gær og erum núna á Péturseynni. Það á að landa annað kvöld og þá verður komið þjóðhátíðarstopp,“ segir Jón.

• Blogga um frétt