Veiðin hefur gengið vel hjá áhöfn Vilhelms Þorsteinssonar EA-11, uppsjávarskipi Samherja, og tókst þeim að ná 660 tonnum af makríl í einu holi á dögunum. Er það líklega það stærsta á vertíðinni.

Landað var í Færeyjum á sunnudag og síðan um kvöldið haldið á miðin norður af Jan Mayen, siglingin var um 600 sjómílur og er skipið nú á leið til hafnar í Neskaupstað með 1.580 tonn.

Siglingaleiðin er löng. Ljósmynd/Samherji

„Fyrsta holið skilaði okkur um 260 tonnum eftir að hafa dregið í fjóra tíma. Við köstuðum þrisvar sinnum, auk þess sem dælt var yfir til okkar einu holi úr Beiti NK. Þetta er ágætis fiskur eða um 480 grömm. Síðasta holið var mjög stórt, 660 tonn. Samtals vorum við nítján klukkustundir á veiðum í þessum túr. Allur búnaður í skipinu er öflugur og vel gekk að dæla hráefninu í tankana og kæla, þannig að það haldist sem best til vinnslu,“ segir Hjörtur Valsson, skipstjóri Vilhelms Þorsteinssonar, í færslu á vef Samherja.

Hann segir veiðina hafa verið ágæta síðasta hálfa mánuðinn en ómögulegt að spá hvernig vertíðin mun þróast. „Makríllinn er á hraðferð norður, færir sig um 30 til 50 mílur á sólarhring. Miðin eru austan við Jan Mayen, norðan við 72. gráðu, þannig að siglingin á miðin lengist í raun með hverjum deginum sem líður. Ég held að flotinn hafi aldrei áður sótt svona norðarlega. Þetta þýðir að megnið af túrunum fer í að sigla fram og til baka en á móti kemur að veiðin er nokkuð góð, svo og hráefnið.“

Aflanum dælt um borð. Ljósmynd/Samherji

Unnið alla verslunarmannahelgina

„Það er blíða þessa stundina og sléttur sjór en ég býst við mótvindi á leiðinni. Siglingin til Neskaupstaðar er um 550 sjómílur og við löndum á föstudaginn, sem þýðir að það verður unnið alla verslunarmannahelgina í fiskiðjuveri Síldarvinnslunnar í Neskaupstað. Mér skilst að það taki hátt í tvo sólarhringa að vinna hráefnið sem við komum með,“ segir Hjörtur.

„Það er alltaf gaman þegar vel gengur eins og núna. Siglingin á miðin er löng og þá er líka eins gott að flotinn sé öflugur, vel búinn og skili góðu hráefni. Olíukostnaðurinn hefur hækkað mikið og þá kemur sér vel að hafa skip sem nýtir afl vélanna sem best. Við erum átta í áhöfn, allt saman hörku karlar. Skipið er frábært og við erum að landa góðu hráefni. Á vertíð eins og þessari er ekkert verið að spá í verslunarmannahelgina, við höldum á miðin strax að lokinni löndun.“

Vilhelm Þorsteinnson EA-11. Ljósmynd/Samherji

Tengdar fréttir

Makrílveiðar

130 þúsund tonna upphafskvóti í makríl

• Fá að færa 25% makrílkvótans á næsta ár
• Eining um heildarkvóta en ekki skiptingu
• Leggur til 22% lækkun á makrílveiðum
• Útbreiðsla makríls í íslenskri landhelgi ein sú minnsta

» Fleiri tengdar fréttir

• Blogga um frétt