„Það gekk þokkalega að fá þorskinn“

Ísfisktogarinn Gullver NS kom til hafnar á Seyðisfirði með 90 tonna afla að lokinni fyrstu veiðiferð eftir verslunarmannahelgi. Aflinn er blanadður en mest af þorski og nokkuð af karfa, auk ýsu og ufsa.

„Hann gekk svona sæmilega. Við reyndum við ufsa en eins og oft áður gekk það ekki vel. Þá gaf karfinn sig ekki heldur. Ýsu er hins vegar víða hægt að fá og það gekk þokkalega að fá þorskinn,“ segir Steinþór Hálfdanarson, skipstjóri á Gullver, um túrinn í færslu á vef Síldarvinnslunnar.

„Við fórum allvíða í túrnum. Vorum um tíma á Lónsdýpi og síðan á Stokksnesgrunni, Papagrunni og í Berufjarðarál. Þorskinn tókum við síðan utan Fótar. Veður var þokkalegt allan túrinn; suðvestan golukaldi lengst af. Þessi túr var fimm dagar höfn í höfn og ég held að menn verði bara að vera sæmilega sáttir með hann,“ segir Steinþór.

Sumarfri hefur verið hjá starfsfólki fyrstihúss Síldarvinnslunnar á Seyðisfirði en gert er ráð fyrir að vinnsla hefjist á ný þann 17. ágúst.

• Blogga um frétt