Smábátafélagið Fontur kveðst í ályktun félagsfundar, sem haldinn var á Þórshöfn, styðja hugmyndir Svandísar Svavarsdóttur, matvælaráðherra, um svæðisskiptingu strandveiða. Félagið stendur þó enn við kröfu sína um að öllum verði tryggðir 48 veiðidagar.

Vegna góðs gengis veiða á strandveiðunum í sumar, sérstaklega á svæði A, kláruðust aflaheimildir sem strandveiðum var ráðstafað áður en veiðitímabilinu lauk og skiptist aflinn mjög ójafnt milli svæðanna.

Fontur er félag smábátaútgerðarmanna á Kópakeri, Raufarhöfn, Þórshöfn, Bakkafirði og Vopnafirði.

Frétt af mbl.is

Leggur til svæðaskiptingu strandveiða á ný

„Smábátafélagið Fontur styður heilshugar við framkomnar hugmyndir matvælaráðherra um að svæðaskipta því aflamarki sem ætlað er til strandveiða í réttu hlutfalli við útgefin strandveiðileyfi á hverju svæði. Með því er hvergi verið að hvika frá kröfu um 48 strandveiðidaga en þar til því takmarki er náð teljum við nauðsynlegt að jafna afkomumöguleika smábátaeigenda óháð búsetu,“ segir í ályktun félagsfundar Fonts sem birt hefur verið á vef Landssambands smábátaeigenda.

Mikill afli en ójafnt skipt

Strandveiðitímabilið hefst í maí og á að ljúka eigi síður en við lok ágústmánaðar samkvæmt gildandi reglum. Veiðum getur hins vegar lokið fyrr ef aflaheimildirnar klárast eins og gerðist í sumar þegar síðasti dagur veiða var 21. júlí. Fengu strandveiðibátarnir þó að veiða 12.567 tonn, meira en nokkru sinni fyrr.

Krafan um 48 veiðidaga gæti hins vegar kallað á mun meiri aflaheimildir en veittar voru í ár. Hugsanlega yfir 20 þúsund tonn. Þorskkvótinn verður líklega skertur á næsta fiskveiðiári í samræmi við ráðgjöf Hafrannsóknastofnunar og hefur verið viðrað hugmyndum um að taka þorskkvóta úr byggðakvótanum til að auka heimildir til strandveiða.

Frétt af mbl.is

48 veiðidagar gætu þurft 21 þúsund tonn

Alls tóku 712 bátar þátt sem eru óvenju margir, en 46% þeirra voru á svæði A þar sem veiðin hefst fyrr meðal annars vegna þess að þar er þorskurinn í ríkulegu magni á þessum árstíma. Lönduðu bátarnir á svæði A tæplega 56% afla veiðanna. Ámóti voru til að mynda ríflega 20% allra báta á svæði B, en þeir fengu aðeins 16% aflans.

Veiðisvæðin skiptast þannig:

• Svæði A: Eyja- og Miklaholtshreppur til Súðavíkurhrepps.
• Svæði B: Strandabyggð til Grýtubakkahrepps.
• Svæði C: Þingeyjarsveit til Djúpavogshrepps.
• Svæði D: Sveitarfélagið Hornafjörður til Borgarbyggðar.

Strandveiðisvæðin Mynd/Skjáskot

Upphaflega stóð að smábátafélagið Fontur á Þórshöfn hafi ályktað en félagið nær einnig til Raufarhafnar, Kópaskers, Bakkafjarðar og Vopnafjarðar. Fréttin hefur verið leiðrétt með tilliti til þess.

Tengdar fréttir

Strandveiðar

„Þetta er bara hræðsluáróður“

• Lýsa áhyggjum af áformum ríkisstjórnar
• Óásættanlegt að taka atvinnu af öðrum
• „Þetta er svo mikil bull umræða“
• Binda enda á 63 ára útgerðarsögu

» Fleiri tengdar fréttir

• Blogga um frétt