Svissnesku tökumennirnir, sem segjast vera frá Swiss National Broadcasting Corporation, hafa gefið skýrslu hjá lögreglunni á Akranesi um athæfi starfsmanna Hvals hf., þar sem þeir lögðu hald á dróna Svisslendinganna sem þeir notuðust við til að mynda hvalstöðina í Hvalfirði.

Ásmundur Kr. Ásmundsson, yf­ir­lög­regluþjónn hjá lög­regl­unni á Vest­ur­landi, seg­ir að málið sé til rann­sókn­ar.

„Málið er bara í rannsókn hjá okkur. En áður en við förum út í einhverjar frekari aðgerðir þá köllum við eftir því að þeir skili drónanum, áður en við þurfum að fara í húsleitir,“ segir hann í samtali við mbl.is.

Frétt af mbl.is

Tóku svissneskan dróna traustataki

Horft yfir hvalstöðina úr lofti. Hvalur hefur kært málið til lögreglu. mbl.is/Eggert Jóhannesson

Skil Hvals á drónanum borðleggjandi

Kristján Loftsson, framkvæmdastjóri Hvals, segir í samtali við Morgunblaðið í dag að starfsmenn Hvals hafi neitað að skila drónanum til lögreglu þar sem þeir þurfa að hafa „einhver sönnunargögn“, en starfsmennirnir lögðu hald á drónann eftir að Svisslendingarnir höfðu að sögn starfsmannanna Hvals flogið honum í um 20 metra hæð yfir athafnasvæði Hvals.

Slíkt sé ólöglegt og hefur Hvalur kært málið til lögreglu.

Aðspurður segir Ásmundur það borðleggjandi að Hvalur þurfi að skila drónanum.

„Annars þurfum við að fara og sækja hann. Ef við vitum hvar hann er niðurkominn þá förum við og sækjum drónann, við fáum bara úrskurð,“ segir hann en ítrekar að málið sé til rannsóknar.

Ekki í lagi að taka frá öðrum

Í samtali sínu við Morgunblaðið sagði Kristján að hóp­ur­inn sem stýrði téðum dróna sé þó ekki sviss­neska rík­is­út­varpið, sem heit­ir Swiss Broa­dcasting Corporati­on, held­ur einka­rek­in sviss­nesk vefsíða sem nefnist Swiss Nati­onal Broa­dcasting Corporati­on.

Ásmundur segir aftur á móti að hann haldi að tökumennirnir séu í raun frá svissneska ríkisútvarpinu. Um sé að ræða ríkisfjölmiðil.

„Ég get þó ekki fullyrt það. En það breytir því hins vegar ekki þó að um minni miðil sé að ræða, því að það er ekki í lagi að taka eitthvað tæki frá öðrum, alveg sama hversu verðmætt.“

Tengdar fréttir

Hvalveiðar

Segir gjaldþrot Skagans vera áfall og skýtur á VG

• Hvalurinn er ekki að éta neitt megrunarkex
• Ráðuneytið skammti mismunandi gögn
• Afrán hvala tvöfaldast á þessari öld
• Jón segist ekki skulda Bjarkeyju

» Fleiri tengdar fréttir

• Blogga um frétt