Það hefur færst aukinn kraftur í makrílveiðarnar og hafa íslensk skip og bátar náð að landa um 6.000 tonn á síðastliðnum sex dögum samkvæmt gögnum Fiskistofu. Makríllinn hefur færst inn í íslenska lögsögu eftir að hafa verið við íslensku línuna í Smugunni og hafa nokkur skip verið á makrílveiðum í lögsögunni.

Heildaraflinn er kominn í 72 þúsund tonn en enn eru eftir 75 þúsund tonn af útgefnum aflaheimildum. Þrátt fyrir að styttra er að sækja fiskinn er fátt sem bendir til að takist að veiða allan þann afla sem útaf stendur.

Í færslu á vef Síldarvinnslunnar segir að makríllinn sem fæst í íslensku lögsögunni sé stór, en að veiðin hafi verið misjöfn milli skipa. „Núna er kaldi á miðunum og er alltaf erfiðara að eiga við makrílinn við slíkar aðstæður. Bindum við vonir við að fiskurinn sé að færast meira inn til okkar. Einnig er veiði austanmegin í smugunni við noregslínuna, en fiskurinn er mun smærri þar.“

„Enn vantar herslumuninn uppá að kvótinn náist og segja má að lokasprettur vertíðarinnar sé hafinn.  Veiðin hefur verið blettótt það sem af er vertíð, komið dagar með góðri veiði og síðan lakara inná milli eins og gengur,“ segir í færslu Síldarvinnslunnar.

Tengdar fréttir

Makrílveiðar

„Veiðiárangur er oft spurning um heppni“

• „Þetta gengur mjög rólega og lítið um makríl“
• Fyrsti makríllinn úr íslenskri lögsögu
• Tæplega fimm kíló af makríl fyrir eitt af þorski
• „Verðmætum þessum fylgir líka ábyrgð“

» Fleiri tengdar fréttir

• Blogga um frétt