Akurey á leið í slipp í Reykjavík

Ísfisktogarinn Akurey AK, sem Brim gerir út, lauk síðasta túr sínum á fiskveiðiárinu þegar skipið lagði við bryggju í Reykjavík á mándag. Skipið er nú á leið í slipp þar sem hefðbundnu viðhaldi verður sinnt auk þess sem aðalvélin verður tekin upp, að því er fram kemur í færslu á vef útgerðarinnar.

Þar er haft eftir Eiríki Jónssyni, skipstjóra á Akurey, að síðasta veiðiferð fiskveiðiársins hafi verið stutt og að aflinn hafi verið í samræmi við það, um 60 tonn.

„Þegar við fórum út var komið slæmt veður á Vestfjarðamiðum og því var ekki um annað að ræða en að halda sig fyrir sunnan. Við hófum veiðar á Fjöllunum í von um að fá ufsa. Það var því miður ekki mikið um hann. Það kom í sjálfu sér ekki á óvart því það var smæsti straumur. Ufsinn gefur sig illa til í slíkum aðstæðum,” segir Eiríkur.

Var þá haldið í Skerjadjúp. „Við fengum dálítið af djúpkarfa en ufsaaflinn var ekki mikill. Í heildina dreifðist aflinn á milli tegunda en við höfum sennilega verið með mest af gullkarfa,” segir Eiríkur.

Eiríkur Jónsson, skipstjóri á Akurey. Ljósmynd/Brim

• Blogga um frétt