437 milljón króna mettúr hjá Blængi

Blængur NK, frystitogari Síldarvinnslunnar, kom til hafnar í Neskaupstað í morgun með 750 tonna afla að verðmæti 437 milljóna króna. „Þetta er stærsti túr Blængs á Íslandsmiðum. Það eru einungis Barentshafstúrar sem hafa verið stærri,“ segir Bjarni Ólafur Hjálmarsson, skipstjóri Blængs, í færslu á vef útgerðarinnar.

„Við veiddum á Austfjarðamiðum og síðan á Halanum. Túrinn gekk vel og það var gott veður allan tímann. Við veiddum mest grálúðu fyrir austan og náðum einum 210 tonnum af henni. Á miðunum fyrir vestan var aflinn blandaður. Það voru tignarlegir borgarísjakar á Halamiðum og þeir settu svo sannarlega svip á umhverfið. Þarna var til dæmis jaki sem var um 30 metra hár en það þýðir að hann hafi náð eina 900 metra niður,“ segir Bjarni Ólafur.

Veiðiferð Blængs var 37 dagar, en millilöndun fór fram í Neskaupstað 6. ágúst. Blængur heldur á miðin á ný á föstudag.

• Blogga um frétt