„Við höfum hitt asskoti vel á þetta að undanförnu“

Það hefur almennt verið erfitt fyrir íslensku fiskiskipin að ná ufsanum en nú virðist einhver breytinga hafa orðið þar á, að minnsta kosti hjá ísfisktogaranum Bergi VE.

„Við höfum hitt asskoti vel á þetta að undanförnu,“ segir Jón Valgeirsson skipstjóri í færslu á vef Síldarvinnslunnar. Skipið landaði fullfermi í Vestmannaeyjum á sunnudag og svo aftur í gær og var aflinn langmest ufsi sem fékkst á Öræfagrunni og Síðugrunni.

„Það hefur verið býsna snúið að eiga við ufsann. […] Nú bregður hins vegar svo við að það hefur verið góð ufsaveiði hjá okkur í ágústmánuði,“ segir Jón. „Ufsinn hefur verið á afmörkuðum svæðum og veiðin hefur sjaldnast enst lengi þannig að við höfum einfaldlega verið mjög heppnir. Þessi ufsaveiði kom sér vel í lok kvótaársins og menn eru mjög sáttir við veiðina að undanförnu.“

Aflabrögð þokkaleg en veður misjafnt

Aflinn var hins vegar blandaðu hjá Vestmannaey VE sem landaði í Vestmannaeyjum á mánudag og aftir í gær. Í báðum veiðiferðum sótti skipið miðin á Breiðamerkurdýpi, Öræfagrunni, Síðugrunni, Reynisdýpi, Ingólfshöfða og Víkinni.

Aflabrögð voru þokkaleg en veðrið misjafnt, að sögn Egils Guðna Guðnasonar, skipstjóra á Vestmannaey.  „Í fyrri túrnum var samfelld blíða en í þeim síðari var breytilegt veður og um tíma hundleiðinlegt,“ segir í færslunni.

• Blogga um frétt