Kveðst í spennutreyju vegna karfans
Setja bókamerki
„Við erum í spennitreyju hvað varðar karfann en verst er að það er alltaf verið að þrengja treyjuna,“ segir Friðleifur Einarsson, skipstjóri á Helgu Maríu AK, um síðasta túr í færslu á vef Brims. Vísar hann til þess að sífellt minna er gefið út af karfakvóta.
Ráðgjöf Hafrannsóknastofnunar um heildarafla í gullkarfa fyrir fiskveiðiárið 2022/2023 var 20% minni en fyrir fiskveiðiárið á undan. Kollegi Friðleifs, Eiríkur Jónsson skipstjóri á Akureyr AK, sagði forsendur ráðgjafarinnar „hreint bull“. Ákveðið hefur þó verið að fylgja ráðgjöfinni og skerða útgefnar heimildir í tegundinni.
Friðleifur segir einnig áskorun að komast undan ýsunni. „Við reynum bara að forðast hana og veiða sem meðafla. Það gildir því sama um hana og karfann.”
Ein á Kolbeinseyjarhryggi
Togarinn var á veiðum á hrauninu á Kolbeinseyjarhryggnum og var Helga María þar ein á veiðum, að minnsta kosti til að byrja með, að sögn skipstjórans. „Þetta byrjar vel hjá okkur. Við náðum a.m.k. því sem vinnslan skammtaði okkur. Heildaraflinn er um 120 tonn, mest þorskur.”
„Það var fínt að sitja einn að þessu til að byrja með en skipunum fjölgaði svo smám saman og það var kominn töluverður fjöldi skipa á svæðið þegar við fórum. Þarna er nánast eingöngu þorskur ef frá eru taldar ein og ein grálúða sem skila sér í trollið. Ufsi er ekki í veiðinni en hann er brellinn og skýtur upp kollinum þegar minnst varir. Gullkarfa þarf ekki að óttast þarna,“ útskýrir Friðleifur.
Skipið kom til hafnar á Suðárkróki á þriðjudag og er um er að ræða annað skipti í röð sem skipið landar þar. Skipstjórinn segir það hafa nokkra kosti. „Það er að mörgu leyti fínt að landa á Króknum. Siglingin frá miðunum er um 10 til 11 tímar. Það gerir okkur kleift að stytta túrana og landa oftar. Aflinn er svo fluttur suður til Reykjavíkur með flutningabílum og það tekur ekki nema tæpa fjóra tíma.”
Fresta dómsuppkvaðningu í máli Trumps
Fylgi Miðflokksins komi frá Sjálfstæðisflokknum
Samfylkingin niður í 27% og VG út af þingi
Eldgos í sumar sennilega það síðasta
Hýsa nú töluvert færri umsækjendur um vernd
„Gamla whitespirit-blandan var alveg eins“
Erfiðara að vernda Bláa lónið í nýju gosi