Greiða 12 milljarða vegna verðsamráðs en neita sök

Stærstu laxeldisfyrirtæki Noregs hafa samþykkt að greiða vinnslustöðvum í Bandaríkjunum 85 milljónir bandaríkjadali, jafnvirði tæplega 12 milljarða íslenskra króna, til að binda enda á málsókn vegna meints verðsamráðs. Félögin játa ekki að brot hafi verið framið.

Fiskeldisrisarnir Mowi ASA, Grieg ASA, SalMar ASA, Lerøy Seafood Group ASA, Cermaq Group AS, and Ocean Quality AS var stefnt árið  2019 af fiskvinnslum, dreifingaraðilum og veitingastöðum í Flórída, Massachusetts, New York, Ohio, Washington D.C. og Pennsylvaníu.

Voru fyrirtækin sökuð um að hafa átt í verðsamráði sem hafði áhrif á heimsmarkaðsverð með því að ákveða svokallað „spot“-verð Nasdaq í Osló. Vísuðu allir stefnendur til yfirstandandi rannsóknar framkvæmdastjórnar Evrópusambandsins um meint verðsamráð.

Frétt af mbl.is

Norskur laxeldisrisi rannsakaður í Bandaríkjunum

113 milljónir bandaríkjadala

Fram kemur í umfjöllun Bloomberg Law að Cecilia M. Altonaga, dómari við alríkisdómstólinn í Suður-Flórída, hafi á fimmtudag undirritað sátt milli fiskeldisfyrirtækjanna og kaupendanna sem stefndu þeim. Þá ákvað dómarinn að gera eldisfyrirtækjunum að greiða 25,5 milljónir bandaríkjadali í málskostnað og 2,6 milljónir bandaríkjadali í lögfræðikostnað stefnenda.

Alls greiða fyrirtækin því rétt rúmar 113 milljónir bandaríkjadala sem er jafnvirði tæplega 16 milljarða íslenskra króna.

Ákvörðun Altonaga um að samþykkja sáttina kemur 18 mánuðum eftir að hún í mars 2021 ákvað að meðferð málsins skyldi halda áfram, með vísan til samhliða verðlagningar, grunsamlegra viðskipta milli eldisfyrirtækjanna og dótturfélaga þeirra, funda meðal stjórnenda þeirra, löggæslurannsókna og annarra sönnunargagna.

Fyrirtækin hafa ítrekað neitað því að hafa brotið lög og segja ástæðu þess að ákveðið var að leita sátta hafa verið vilji til að ljúka málinu.

• Blogga um frétt