Fara beinustu leið í Rósagarðinn

„Ég reikna með að við förum beinustu leið í Rósagarðinn,“ segir Þorkell Pétursson, skipstjóri á Barða NK, um komandi kolmunnaveiði í færslu á vef Síldarvinnslunnar. Skipið leggur frá bryggju í Neskaupstað í dag og heldur á kolmunnamiðin.

„Þar var mjög góð veiði í fyrra í byrjun októbermánaðar og við fengum þar nokkra fullfermistúra á Bjarna Ólafssyni AK. Mig minnir að við höfum tekið þar eina fjóra túra. Við höldum til veiða fullir bjartsýni en verst er að spáin er heldur ljót fyrir sunnudag og mánudag,“ segir Þorkell.

Hann segir áhöfnina á Barða fulla af bjartsýni vegna kolmunnavertíðarinnar. „Það er ekkert skip farið að reyna við kolmunnann núna þannig að við verðum fyrstir og það er auðvitað ákveðin spenna fólgin í því að vera fyrstir til að hefja veiðar.“

• Blogga um frétt