Óvæntur dökksilfri í Rósagarðinum

Ljósafell SU-70, togari Loðnuvinnslunnar á Fáskrúðsfirði, var við veiðar suðaustur af landinu um miðjan september þegar óvænt veiddist dökksilfri (Diretmichtys parini).

Togarinn var staddur á Þórsbanka í Rósagarðinum svokallaða, þar sem hann var að veiða í botntroll á 175 faðma dýpi, að því er fram kemur í færslu á vef Loðnuvinnslunnar. 175 faðmar eru um 293 metrar.

„Það er alltaf gaman að sjá fiska sem ekki eru algengir hér við land,“ segir í færslunni og er þar vakin athygli á að tegundin sé ekki skyld karfa þótt tegundirnar kunni að virðast líkar í útliti. Búrfiskur og bjúgtanni eru hins vegar náskyldir dökksilfra.

Fiskurinn finnst víða um heim allan en samkvæmt Fishes of Australia er dökksilfra helst að finna á hitabeltissvæðum þó hann eigi það til að dvelja einnig á tempruðum svæðum. Hann er því ekki algengur í hafinu umhverfis Ísland. Þó er þekkt að hann hafi veiðst einstaka sinnum, einmitt í Rósagarðinum.

Þá er um miðsævisfisk að ræða sem heldur sig alla jafna á 200 til 2.100 metra dýpi og veiðist helst í flotvörpu. Hámarksstærð er talin vera um 37 til 40 sentímetrar en sá stærsti sem veiðst hefur við Íslandsstrendur var 42 sentímetrar að því er segir á vef Hafrannsóknastofnunar.

Dökksilfri er ekki fríður fiskur. Ljósmynd/Loðnuvinnslan: Þorgeir Baldursson

• Blogga um frétt