Góð veiði eftir brotthvarf makrílsins

Ísfisktogarinn Vestmannaey VE landaði fullfermi í Eyjum á fimmtudag og aftur í morgun, að því er fram kemur í færslu á vef Síldarvinnslunnar.

Sagt er frá því að veitt hafi verið suður af landinu, á Öræfagrunni, Meðallandsbugt, Pétursey og Víkinni og að aflinn hafi mest verið þorskur og ýsa. Aðeins tvo og hálfan sólarhring hefur tekið að fylla í báðum veiðiferðunum.

„Síðustu ár hafa Vestmannaeyjaskipin Vestmannaey og Bergur (áður Bergey) hafið veiðar austur af landinu í byrjun septembermánaðar en nú er veitt fyrir sunnan land eins og áður segir. Svo virðist vera að fiskurinn hafi nóg að éta suður af landinu og haldi sig því þar. Sjómennirnir telja að brotthvarf makrílsins þaðan hafi mikið að segja og sandsílið hafi þar náð sér vel á strik eftir að makríllinn hætti að ganga í ríkum mæli með suðurströndinni, en sandsílið er mikilvæg fæða botnfisks,“ segir í færslunni.

• Blogga um frétt