Grettir sterki fyrsta viðbragð á Breiðafirði

Vegagerðin, Sæferðir og Stykkishólmsbær hafa í samvinnu tekið á leigu dráttarbátinn Gretti sterka sem verður staðsettur í Stykkishólmshöfn, að því er fram kemur í tilkynningu á vef Vegagerðarinnar.

„Þannig á að tryggja að fyrsta viðbragð við atvikum á Breiðafirði verði eins og best verður á kosið miðað við aðstæður,“ segir í tilkynningunni. Þar segir jafnframt að Sæferðir muni sjá um að manna bátinn.

Grettir sterki er dráttarbátur í eigu Togskips ehf. og er með heimahöfn í Reykjavík. Dráttarbáturinn er 27,8 metra langur og 210 brúttótonn. Hann var smiðaður árið 1997 í Hollandi af Scheepswerf Damen B.v.

Fram kemur í tilkynningu Vegagerðarinnar að unnið sé að því að fá annað skip sem getur leyst ferjuna Baldur af. Útboð verður auglýst á næstu vikum.

Frétt af mbl.is

Ræða möguleika Baldurs

• Blogga um frétt