Féll fyrir borð og drukknaði

Skipverji sem leitað var að eftir að bátur hans fannst mannlaus við Engey út af Reykjavík í janúar, hafði fallið frá borði og drukknað. Þetta er niðurstaða rannsóknarnefndar samgönguslysa. Í skýrslu nefndarinnar segir að krufning hafi leitt í ljós að hann hafi verið undir áhrifum.

Stjórnstöð Landhelgisgæslunnar barst klukkan 10.37 þann 26. janúar ábending um að bátur væri hugsanlega strandaður við Engey, en engar upplýsingar voru í kerfum Landhelgisgæslunnar þess efnis að bátur hefði farið á sjó. Við athugun kom í ljós að bátur væri við Engey og talið að einn væri um borð. Þegar björgunarbáturinn Gróa Pétursdóttir mætti á staðinn fannst báturinn hins vegar mannlaus og við það hófst umfangsmikil leit að skipverjanum.

Leit lauk síðan um hálf tvö síðdegis, skömmu eftir að staðfest var að lík sem fannst við Sólfarið sama dag hafi verið skipverjans.

Frétt af mbl.is

Skipverjinn fannst í sjónum við Sólfarið

Í skýrslu nefndarinnar segir að skipverjinn tilkynnti ekki brottför til Vaktstöðvar siglinga (VSS) og að báturinn hafi ekki komið inn í ferilvöktun hjá VSS þar sem ekki var kveikt á sjálfvirka staðsetningarbúnaði bátsins.

„Við skoðun á strandstað kom í ljós að straumur var á rafkerfi bátsins en vél var ekki í gangi. Eldsneytisgjöf var lítillega í áframstöðu og samankúplað. Hældrifið var brotið undan bátnum og lá undir honum stjórnborðsmegin á strandstað. Skrúfublöðin voru brotin af skrúfuhausnum og landtengikapall bátsins vafinn um skrúfuna,“ segir í skýrslunni.

• Blogga um frétt