Tekin í tog aðeins 123 metra frá landi

Allt endaði á besta veg þrátt fyrir að Amelía Rose var komin aðeins 123 metra frá landi þegar tókst að koma skipinu í tog 1. júlí síðastliðinn. Hafði skipið, með 44 farþega og fimm í áhöfn, rekið sífellt nær landi eftir að slökkt var á vélunum vegna þess hve mikið þær hitnuðu.

Þegar komið var til hafnar og kafað var niður að skrúfunni kom í ljós að landfestatóg hafði flækst í stjórnborðsskrúfuna.

Þetta má lesa úr skýrslu Rannsóknanefndar samgönguslysa.

Þar segir að skipið hafi verið á siglingu á Engeyjarsundi og veðuraðstæður góðar. Skipverjar urðu síðan varir við högg.

„Vélstjóri fór þá niður í vélarúm og sá að gír stjórnborðsvélar hitnaði og lykt kom frá ástengi milli gírs og stjórnborðsvélar. Stöðvaði vélstjórinn báðar vélarnar sem voru mjög heitar. Var skipið statt um 650 metra vestan við Engey og rak í austur-norðaustur. Var ákveðið að reyna ekki að sigla til hafnar á annarri vélinni heldur fá annað skip frá útgerðinni til að draga Amalíu Rose til hafnar í Reykjavík.“

• Blogga um frétt