Brim fjárfestir í dönsku félagi fyrir 12 milljarða

Brim hefur náð samkomulagi um kaup á 50% hlutafjár í danska félaginu Polar Seafood fyrir um 12 milljarða króna. 

Samkomulag hefur náðst um kaup á hlutabréfum í danska félaginu fyrir um 245 milljónir danskra króna og að auki hefur Brim skráð sig fyrir nýjum hlutum í félaginu fyrir 380 milljónir danskra króna. 

Heildarkaupverðið sem Brim greiðir er um 625 milljónir danskra króna eða sem samsvarar um 12 milljörðum íslenskra króna. Að því gefnu að viðskiptin gangi í gegn mun Brim eignast 50% hlutafjár félagsins, eins og áður sagði. 

Skilaði 4,4 milljarða hagnaði í fyrra

Samkomulagið er háð hefðbundnum skilyrðum, eins og samþykki viðkomandi yfirvalda. Eftirstandandi hlutir verða í eigu Polar Seafood Greenland A/S. 

Polar Seafood Denmark A/S er sölufyrirtæki, vinnsluaðili og útflytjandi hágæða villtra sjávarafurða úr Norður-Atlantshafi.

Ársvelta félagsins á síðasta ári nam um 3.800 milljónum danskra króna. Félagið hagnaðist um 229 milljónir danskra króna á sama tímabili, sem samsvarar 4,4 milljörðum króna. 

Jákvætt skref

„Polar Seafood Denmark A/S er vel þekkt fyrirtæki með langa sögu í sölu sjávarafurða úr Norður-Atlantshafi. Reksturinn er traustur og starfsfólkið hefur víðtæka reynslu af því að þjóna alþjóðlegum mörkuðum með sjávarafurðir. Stofnun samstarfs við Polar Seafood Danmörku er jákvætt skref og mun styrkja sölunet okkar á sjávarfangi úr Norður-Atlantshafi," er haft eftir Guðmundi Kristjánssyni, forstjóra Brims, í tilkynningu. 

• Blogga um frétt