Heldur dregið úr gangi kolmunnaveiða

Runólfur Runólfsson skipstjóri á Barða NK, segir kolmunnaveiðarnar ekki jafn góðar nú og undabfarnar vikur. Barði NK kom með 1.230 tonn af kolmunna til Neskaupstaðar skömmu fyrir hádegi í gær.

„Nú virðist fiskurinn vera að dreifa sér og ganga suður eftir inn í færeysku lögsöguna. Þennan afla fengum við í sex holum og fór aflinn minnkandi með hverju holi,“ segir Runólfur í færslu á vef Síldarvinnslunnar.

„Í fyrsta holinu fengum við 260 tonn en einungis 70 í því síðasta. Annars er veiðin búin að vera góð í Rósagarðinum og á Þórsbankanum að undanförnu og við kvörtum ekkert. Barði er búinn að fiska þarna hátt í 6000 tonn frá því í lok september og Beitir tók einn 2.000 tonna túr. Þá hafa fleiri skip verið að fá góðan afla. Þessar veiðar hófust seinna í fyrra og entust þá heldur lengur. Fiskurinn hefur göngu sína suður fyrr en í fyrra. Auðvitað er það mikilvægt að veiða kolmunna innan íslenskrar lögsögu og því eru þessar veiðar mikilvægar. Ég geri ráð fyrir því að kolmunnaveiðum verði hætt í bili og nú munum við þrífa skipið hátt og lágt og skipta um troll. Svo ætla menn að njóta árshátíðarinnar sem verður í Gdansk eftir rúma viku,“ segir Runólfur.

• Blogga um frétt