Fjarvera tefji ekki útgáfu skírteinis

„Fjarvera einstakra starfsmanna tefur ekki útgáfu haffæris. Umfjöllunin er því í meginatriðum röng,“ segir Þórhildur Elínardóttir, samskiptastjóri Samgöngustofu, í skriflegu svari vegna fréttar mbl.is í fyrradag um að björgunarsveitin Geisli á Fáskrúðsfirði biði nú eftir að starfsmaður stofunnar kæmi úr fríi á Spáni til að fá gefið út haffærisskírteini og geta notað nýjan bát sveitarinnar.

Frétt af mbl.is

Þurfa líklega að brjóta lög ef útkall berst

Skrifar Þórhildur að forsendur þess að haffærisskírteini fáist útgefið séu að öllum gögnum hafi verið skilað inn, þau yfirfarin og samþykkt með tilliti til gildandi reglna. „Leiki vafi á að skip eða bátar uppfylli öryggiskröfur leiðir það til tafa, enda er haffærisskírteinið staðfesting á því að fleyið sé haffært samkvæmt íslensku regluverki,“ segir enn fremur.

Niðurstaða verði að vera komin í öll mál varðandi yfirferð á hönnunargögnum, þar með töldum stöðugleika, áður en skip séu sett á skrá og fái útgefið haffærisskírteini með frestum eftir atvikum, en slíkt sé þó ekki óalgengt við nýskráningar.

• Blogga um frétt