Hafa fengið 130 flotgalla frá VÍS
Setja bókamerki
Hilmar Snorrason, skólastjóri Slysavarnaskóla sjómanna, tók á dögunum við tíu nýjum flotvinnubúningum frá VÍS. Um er að ræða þrettánda sinn sem VÍS veitir skólanum slíkan öryggisbúnað að gjöf, að því er fram kemur í fréttatilkynningu.
Þar segir að búningarnir nýtast nýtast nemendum sem og stjórnendum skólans þegar björgunaræfingar fara fram. Flotvinnubúningarnir sem gefnir hafa verið skólanum eru nú orðnir 130 talsins og er samanlagt verðmæti þeirra 40 milljónir króna.
„Forvarnir eru okkar hjartans mál og því erum við stolt af samstarfinu við Slysavarnaskóla sjómanna. Við viljum fækka slysum á sjó og erum þakklát fyrir að geta lagt okkar að mörkum til þess að auka öryggi sjómanna,“ segir Guðný Helga Herbertsdóttir, framkvæmdastjóri sölu og þjónustu hjá VÍS, í tilkynningunni.
„Við erum þakklát fyrir stuðninginn því þetta styður með rausnarlegum hætti við skólann. Við viljum auka öryggi sjómanna og notkun flotvinnubúninga skiptir gríðarlegu máli ─ en dæmi eru um að slíkur búnaður hefur bjargað mannslífum á sjó. Sú staðreynd að allir sjómenn nemi við Slysavarnaskóla sjómanna ─ styður við öryggishegðun og öryggishugsun um borð. Þetta framlag VÍS skiptir okkur miklu máli, því við verðum að vera með nýja og heila flotvinnubúninga í kennslunni hverju sinni,“ er haft eftir Hilmari.
Þá er vakin athygli á að flestir nemendur Slysavarnaskóla sjómanna séu starfandi á fiskiskipum en samkvæmt lögum þurfa sjómenn bæði grunnmenntun og reglulega endurmenntun í öryggismálum og fer bókleg og verkleg kennsla, til dæmis í meðferð björgunarbúnaðar, fram um borð í skólaskipinu Sæbjörgu.
Veittu RNSA skráningarkerfi
Á síðasta ári afhenti VÍS Rannsóknarnefnd samgönguslysa (RNSA) atvikaskráningarkerfið ATVIK-sjómenn. Tilgangur þess er að skapa miðlægan gagnagrunn atvikaskráninga sem síðan getur verið grundvöllur forvarna sem draga úr slysum.
Kerfið var fimm ár í þróun hjá VÍS, en hefur verið breytt til að aðlaga það að þörfum RNSA. Jafnframt verða nú öll atvik skráð hjá nefndinni, en hafa hingað til verið skráð á þremur mismunandi stöðum.
„Þrátt fyrir að banaslysum hafi fækkað á sjó, þá er enn talsvert langt í land að fækka slysum hjá sjómönnum. Að meðaltali eru 170 sjóslys tilkynnt til Sjúkratrygginga Íslands á hverju einasta ári. Hins vegar er það áhyggjuefni að einungis 30% þessara slysa eru tilkynnt til Rannsóknarnefndar samgönguslysa ─ sem einmitt hefur það hlutverk að rannsaka slysin, greina þau og koma með tillögur að forvörnum. Þetta var gjöf frá VÍS til íslenskra sjómanna ─ samfélaginu til heilla,“ segir í tilkynningunni.
Hera komst ekki áfram
Upphafsfasinn hættulegastur
Eina leiðin að sekta ökumenn
Erfiðar viðræður að baki
Grindavíkurbær fækkar starfsfólki
Innri endurskoðun gerir úttekt á máli olíufélaganna
„Öðruvísi hefði nafnið ekki farið á samninginn“