Ætla að áfrýja 120 milljóna stjórnvaldssekt

Arnarlax hyggst kæra ákvörðun Matvælastofnunar (MAST) sem hefur lagt 120 milljóna króna stjórnvaldssekt á fyrirtækið vegna brots gegn skyldu um að tilkynna um strok á fiski og beita sér fyrir veiðum á strokfiski.

Í tilkynningu frá Arnarlaxi kemur fram að í ákvörðun MAST sé sérstaklega tiltekið að Arnarlax hafi greiðlega veitt MAST þær upplýsingar sem óskað var eftir og að fyrirtækið hafi ekki haft neinn ávinning af meintu broti.

Frétt af mbl.is

Arnarlax sektað um 120 milljónir

Forsendur áfrýjunar er að öllum viðbragðsferlum fyrirtækisins hafi verið fylgt til hins ítrasta, sem og lögum og reglum. Bæði í aðdraganda óhappsins og í kjölfar þess.

„Arnarlaxi þykir mjög miður að lax hafi sloppið úr kví fyrirtækisins en starfsfólk leggur hart að sér alla daga til að koma í veg fyrir að slíkt geti gerst. Þrátt fyrir að Arnarlax telji að verklagsreglum hafi verið fylgt í umræddu tilviki þá mun fyrirtækið draga lærdóm af þessu óhappi,“ segir í tilkynningunni.

• Blogga um frétt