„Leitinni hefur verið frestað þar til í birtingu í fyrramálið,“ segir Ásgeir Erlendsson, upplýsingafulltrúi Landhelgisgæslu Íslands, um stöðu mála við leit að sjómanninum sem féll útbyrðis af línuskipinu Sighvati GK-57 um helgina.

Frétt af mbl.is

Sjóslys við Garðskaga

Varðskipið Þór hefur verið við leit í dag ásamt björgunarskipinu Oddi V. Gíslasyni og þyrlu Landhelgisgæslunnar. Var leitarsvæðið stækkað og leitað í 18 sjómílna radíus frá þeim stað sem miðað er við að maðurinn hafi fallið í sjóinn á.

Öflugur búnaður til leitar

„Við gerum ráð fyrir að halda leit áfram á morgun, Þór heldur inn á Stakksfjörð í kvöld en hefur svo leit á ný í fyrramálið og við tökum svo bara stöðuna á því hvaða einingar verða nýttar við leitina á morgun en ljóst er að það verður að minnsta kosti áhöfnin á Þór,“ segir Ásgeir.

Auk þess að nýta eigin augu og sjónauka er leitað á léttabátum varðskipanna svo kanna megi stærri svæði. Ljósmynd/Landhelgisgæsla Íslands

Hann segir þyrlur Gæslunnar mjög vel búnar til leitar. „Auðvitað eru menn bara á „útkikkinu“ en öll áhöfnin er líka með mjög öfluga nætursjónauka þegar leitað er að nóttu til auk þess sem þyrlurnar eru búnar öflugum myndavélum,“ útskýrir Ásgeir, „og þetta er allt saman notað eftir atvikum auk þess sem áhafnirnar eru mjög vel þjálfaðar þegar kemur að sjónleit úr lofti.“

Á varðskipinum séu áhafnir meira háðar eigin augum eingöngu en auk þess sé farið á léttabátum frá skipunum og þannig leitað á stærra svæði. „Þarna eru allar leiðir nýttar sem færar eru,“ segir Ásgeir Erlendsson upplýsingafulltrúi.

Tengdar fréttir

Leitin að Ekasit

Leitað í alla nótt og gögn nú yfirfarin

• Skipverjans leitað með neðansjávarfari
• Nafn mannsins sem saknað er
• Gríðarlegt högg fyrir lítið samfélag
• Féll útbyrðis af línuskipinu Sighvati í eigu Vísis

» Fleiri tengdar fréttir

• Blogga um frétt