Kaupa nýja heildarvinnslulínu frá Marel

Marel og Eðalfiskur hafa gert með sér samning um nýja heildarvinnslulínu til framleiðslu á laxi. Um er að ræða nýja kynslóð laxaflökunarvélar frá Marel, auk Curio hausunarvélar sem nýsköpunarteymi Marel mun þróa í samstarfi við Eðalfisk

Vinnslulínan mun taka heilan, slægðan lax og skila beinhreinsuðum og snyrtum flökum sem eru tilbúin til ferskfiskpökkunar eða frekari vinnslu, á borð við bitavinnslu, frystingu eða reykingu og gröfun, að því er fram kemur í fréttatilkynningu frá Marel.

Þar segir jafnframt að Eðalfiskur stefni að mikilli uppbyggingu sem tekur mið af stóraukinni framleiðslu í sérhæfðri og BRC vottaðri laxavinnslu félagsins í Borgarnesi.

Bent er á að móðurfélag Eðalfisks, Eðalfang, hafi nýverið lokið eins milljarðs króna fjármögnun sem nýta á að hluta til fjárfestinga í tækjabúnaði og sjálfvirknivæðingu sem liður í uppbyggingu og eflingu á vinnslu til framleiðslu á laxi.

Eðalfiskur framleiðir m.a. reyktan og grafinn lax.

Bætt nýting

”Við hjá Marel erum stolt af samkomulagi okkar við Eðalfisk um svo spennandi verkefni. Okkar kerfi miðar að því að bæta meðferð fisksins og auka nýtingu hans og gæði. Verkefnið er spennandi skref í fyrirhugaðri uppbyggingu og aukningu á laxeldi og -vinnslu á Íslandi. Rík tækifæri felast í uppbyggingaráformunum og Marel ætlar sér að taka virkan þátt á þeirri vegferð,” segir Ólafur Karl Sigurðarson, framkvæmdastjóri Marel Fish.

„Það er okkur sönn ánægja að ganga til samstarfs með Marel með kaupum á nýjustu kynslóð vélbúnaðar á heimsvísu fyrir hausun, flökun og snyrtingu á laxi. Fjárfestingin er fyrsti liður okkar hjá Eðalfiski til að tryggja áfram framúrskarandi gæði framleiðslunnar en nú með bættri nýtingu, aukinni sjálfvirkni og afkastagetu sem gerir okkur vel kleift að framfylgja þeim áætlunum sem við höfum sett félaginu til næstu ára,“ segri Andri Gunnarsson, stjórnarformaður Eðalfangs.

• Blogga um frétt