Eigandi Arctic Fish hagnaðist um 155 milljarða

Samstæða norska fiskeldisrisans Mowi, sem festi kaup á meirihluta hlutafjár í vestfirksa fiskeldisfyrirtækinu Arctic Fish í desember, skilaði á síðasta ári jákvæðri rekstrarniðurstöðu fyrir leiðréttingu með tilliti til lífmassa sem nam um milljarð evra sem er jafnvirði um 155 milljarða íslenskra króna. Þetta er besta rekstrarniðurstaða í sögu félagsins.

Þetta má lesa úr bráðabirgðauppgjöri fjórða ársfjórðungs sem fjallað er um á E24.

Mowi greiddi út 724 milljóna norskra króna, rúmlega 10 milljarða íslenskra króna, í arð á síðasta ári í kjölfar þess að met var sett í afkomu félagsins árið 2021 þegar rekstrarniðurstaðan var jákvæð um 523 milljónir evra. Með tilliti til mun betri afkomu má reikna með myndarlegri arðgreiðslu eins og á síðasta ári.

Markaðsvirði Mowi, sem skráð er í kauphöllina í Osló, er nú um 90 milljarða norksra króna sem jafngildir rúmlega 1.300 milljörðum íslenskra króna. Til samanburðar er samanlagt markaðsvirði Síldarvinnslunnar og Brims 405 milljarðar íslenskra króna.

Þreföld ársframleiðsla íslands

Fram kemur að rekstrarniðurstaðan á fjórða ársfjórðungi hafi numið 239 milljónum evra, jafnvirði 37 milljarða íslenskra króna.

Umfangsmesta laxeldi félagsins er í Noregi þar sem slátrað var 87.000 tonnum á síðasta ársfjórðungi 2022. Á tímabilinu var einnig slátrað 10.500 tonnum úr kvíum félagsins í Skotlandi, 11.000 tonnum í Kanada, 18.500 tonnum í Síle, 500 tonnum á Írlandi og 3.000 tonnum í Færeyjum. Í heild var því framleiðslan 130.500 tonn af laxi á þessum þremur mánuðum sem er tæplega þreföld ársframleiðsla fiskeldisfélaganna hér á landi árið 2021.

Rekstru dótturfélagsins hér á landi er ekki í uppgjörinu en það má rekja til þess að kaupin fóru fram mjög seint á árinu.

Frétt af mbl.is

Mowi eignast 51,28% í Arctic Fish

• Blogga um frétt