Von á adrenalíni á undanþágu

„Á íslenskum markaði eru til tvö sérlyf fyrir adrenalín penna með markaðsleyfi, EpiPen og Jext. Þessi lyf eru bæði í skorti í dag, en von er á undanþágulyfi til landsins á næstu dögum,“ segir í svari Lyfjastofnunar við fyrirspurn blaðamanns um skort á adrenalínpennum.

Reglugerð um heilbrigðisþjónustu, lyf og lækningatæki um borð í íslenskum skipum sem sett var af Sigurði Inga Jóhannssyni innviðaráðherra 28. nóvember síðastliðinn gerir ráð fyrir að slíkir pennar séu um borð í 2.240 sjóförum, þar á meðal í 1.917 bátum sem eru minni en 15 metrar að lengd.

Samgöngustofa upplýsir í Morgunblaðinu í dag að lyfjafræðingar hafi vakið athygli stofnunarinnar á að því að „hugsanlega sé þessu lyfi ofaukið fyrir minni skip og Samgöngustofa hefur komið ábendingum þess efnis til ráðuneytisins, sem er að skoða málið“.

Frétt af mbl.is

Gert að útvega ófáanlegt lyf

Eina lyfið sem skortur er á

Í umræddri reglugerð er krafist að um borð í sjóförum séu lyfjakistur sem innihalda fjölda lyfja og lækningatækja sem ítarlega er útlistað í viðauka reglugerðarinnar. Lyfjakisturnar þurfa að standast árlega úttekt og skal eftirlitið framkvæmt af starfandi lyfjafræðingi eða lækni að beiðni útgerðarmanns, öryggisstjóra eða skipstjóra.

Fram kemur í svari Lyfjastofnunar að geymsluþol EpiPen og Jext (adrenalínpenna) er „22-24 mánuðir frá framleiðsludagsetningu, þó má búast við því að lyfið hafi styttri fyrningu þegar það er afgreitt úr apóteki.“ Á þeim grundvelli gæti hæglega farið svo að festa þurfi kaup á nýjum penna árlega til að lyfjakistur standist kröfur reglugerðarinnar.

Í ljósi skorts á adrenalínpennum var Lyfjastofnun spurð hvort skortur sé á eitthvað af þeim fjölda lyfja sem upp eru talin í viðauka reglugerðarinnar. „Önnur skráð lyf sem fram koma í reglugerðinni eru ekki í lyfjaskorti,“ segir í svarinu.

Kom ekki að lyfjaskrá

Var átt samráð við lyfjastofnun við mótun þeirra krafna sem gerðar eru um einstök lyf í íslenskum skipum?

„Innviðaráðuneytið og Samgöngustofa óskuðu eftir aðkomu Lyfjastofnunar við yfirferð á drögum að reglugerð um heilbrigðisþjónustu, lyf og lækningatæki um borð í íslenskum skipum í febrúar á sl. ári. Lyfjastofnun skilaði inn athugasemdum við ákvæði reglugerðarinnar í lok febrúar á sl. ári,“ segir í svarinu.

„Lyfjastofnun hafði ekki aðkomu að yfirferð að lyfjaskrá reglugerðarinnar. Stofnunin benti Innviðaráðuneytinu og Samgöngustofu á að yfirferð á lyfjaskrá um borð í skipum á sjó væri ekki eitt af lögbundnum hlutverkum Lyfjastofnunar. Lyfjastofnun vísaði Innviðaráðuneytinu og Samgöngustofu á að til væru sjálfstætt starfandi lyfjafræðingar sem veita þjónustu á ýmsum sviðum lyfjafræðinnar til fyrirtækja og stofnanna sem gætu tekið slíkt verkefni að sér, ef sú þekking væri ekki til staðar hjá Samgöngustofu.“

• Blogga um frétt