Fyrirtækin eigi góða samleið

„Við erum búin að vera í töluverðu samstarfi við hjá Ice Fish og við [hjá Lýsi ] höfum verið að auka vöruúrvalið hjá okkur, bæta við okkur líka próteinum ásamt olíunni. Þau hafa verið mikið í próteinum og hafa mikla frystigetu. Margir af okkar viðskiptavinum hafa verið að spurja um slíkar vörur og þegar við fórum að skoða þetta reyndust fyrirtækin eiga góða samleið,“ segir Katrín Pétursdóttir, forstjóri Lýsis hf., spurð um kaup félagsins á Ice Fish ehf. í Sandgerði.

Hún segir bæði fyrirtækin áfram verða rekin í sitthvoru lagi en að þau hafi hvort um sig viðskiptasambönd sem nýtast hvort örðu. „Þetta vinnur allt saman.“ Spurð um kaupverð segir Katrín það hafa verið trúnaðarmál.

Frétt af mbl.is

Lýsi kaupir Ice Fish í Sandgerði

Bæta við framleiðsluna í Sandgerði

Fyrirtækin eiga einnig samleið er varðar það hráefni sem þau nota, að sögn Katrínar sem bendir á að þau séu í lykilhlutverki þegar kemur að fullnýtingu sjávarafurða og vinni þannig með aukinni sjálfbærni og góðri umgengni um náttúruna. „Við reynum að gera sem mestu verðmætin úr því hráefni sem okkur berst,“ bætir hún við.

Nánast öll framleiðsla fyrirtækjanna er seld á erlenda markaði, fyrir utan 4% af veltu Lýsis sem verður til innanlands. „Heimamarkaðurinn er okkur dýrmætur, því Íslendingar eru mig vakandi fyrir þeim nýjungum sem eru í boði og gefur okkur því vísbendingar um hver þróunin er í greininni.“

Þá segir Katrín að standi til að bæta við framleiðslueiningu fyrir laxameltu hjá Ice Fish sem er svipuð og við erum með í Þorlákshöfn og er það vegna nálægðar við markaðinn. 

• Blogga um frétt