Nóg hefur verið um að vera í fiskiðjuveri Síldarvinnslunnar í Neskaupstað, en þar hefur verið landað ríflega fjögur þúsund tonnum af loðnu undanfarna daga og hafa um 70 starfsmenn fyrirtækisins verið í samfelldri loðnuvinnslu á þrískiptum vöktum.

Þetta kemur fram í færslu á vef Síldarvinnslunnar.

Um helgina kom Börkur NK með 1.550 tonn og Vilhelm Þorsteinsson EA með 2.100 tonn. Fram kemur í færslunni að lokið hafi verið að vinna aflann úr Vilhelmi Þorsteinssyni í nótt. Þá á eftir að ljúka vinnslu afla úr Beiti NK sem kom í gær með 400 tonn. Aflinn fékkst í tveimur köstum þegar gerðist stutt hlé á brælunni sem truflað hefur veiðar undanfarið.

Geir Sigurpáll Hlöðversson, rekstrarstjóri fiskiðjuversins, segir í færslunni að vinnslan hafi gengið mjög vel. „Við höfum verið að framleiða hæng og svonefnt mix. Hrognafyllingin er núna rúmlega 12% en það verður ekki farið að frysta á Japan fyrr en hún er orðin 15%. Veðurútlit núna er gott og menn eru bjartsýnir hvað varðar veiðina. Hér er því góð stemning og það verður væntanlega nóg að gera á næstunni. Skipin eru að veiða núna út af Suðursveitinni.“

Tengdar fréttir

Loðnuveiðar

Brellin loðna og bjartsýni horfin

• Ný loðnuleit skilar enn lægra mati
• Ekki von á að mæling leiði til breytinga
• Áfram verður leitað að loðnunni
• „Það þarf auðvitað bara að leita betur“

» Fleiri tengdar fréttir

• Blogga um frétt