Aldrei séð viðlíka magn

Aðeins Barði NK og Guðrún Þorkelsdóttir SU hafa verið á kolmunnaveiðum suðaustur af Færeyjum undanfarna daga. Flest uppsjávarskip hafa lokið þeirri vertíð og reyna nú við loðnuna.

Barði er væntanlegur til Neskaupsstaðar í nótt að því er fram kemur á í færslu vef Síldarvinnslunnar. Um borð eru þúsund tonn af kolmunna og hefur veiðiferðin tekið um viku.

„Við vorum fimm daga að veiðum og það voru tekin fimm hol. Yfirleitt var dregið í um tuttugu tíma og aflinn var frá 130 – 230 tonn í holi. Þetta var hinn sæmilegasti fiskur sem þarna var á ferðinni. Stundum lóðaði mjög vel en fiskurinn skilaði sér afar misjafnlega í veiðarfærið,“ segir Þorkell Pétursson,  skipstjóri á Barða, í færslunni.

Þorkell segir að veitt hafi verið við miðlínu milli Færeyja og Hjaltlandseyja.

„Það var kaldi allan tímann en þó gátum við alltaf verið að. Þarna voru einungis tvö íslensk skip, við og Guðrún Þorkelsdóttir SU. Síðan voru þarna nokkur færeysk skip. Hoffell SU var síðan við Rockall og þar var mikill kolmunni á ferðinni norður eftir. Ég heyrði í skipstjóra sem sagðist aldrei hafa séð viðlíka magn og hann er búinn að veiða þarna í tuttugu ár. Það lítur því vel út með kolmunnaveiðina á næstunni,“ segir skipstjórinn.

• Blogga um frétt