Erlingur til háskóla í Alaska í Reykjavík

Háskólinn í Fairbanks í Alaska (UAF) í Bandaríkjunum hefur gerst fyrsti bandaríski háskólinn sem heldur úti starfsemi í húsakynnum Íslenska sjávarklasans og gerðist það með ráðningu Erlings Guðleifssonar til starfa til að efla miðlun vísinda- og tækniþekkingar frá Íslandi til Alaska á sviði sjávarútvegs, orkumála og nýsköpunar, að því er fram kemur í fréttatilkynnignu.

Þar segir að Erlingur hafi verið hluti af ráðgjafateymi Sjávarklasans frá árinu 2018 og að hann hefur víðtæka reynslu og þekkingu á sviði fullnýtingar sjávarafurða og nýsköpunar. Þá er UAF jafnframt sagður framarlega á sviði norðurslóðarannsókna, sjávarlíffræði og þróun orkuinnviða fyrir dreifbýl svæði.

Bent er á að Sjávarklasinn hafi um árabil átt í samstarfi við Alaskaríki og var einn fyrsti dótturklasinn utan Íslands stofnaður þar. Árið 2019 var undirrituð viljayfirlýsing milli Íslenska sjávarklasans og Alaska Ocean Cluster um frekara samstarf. Í tilkynningunni er ráðning Erlings sagt eitt afsprengi þessa samstarfs.

• Blogga um frétt