Barði NK náði 1.225 tonnum af loðnu í tveimur köstum í síðustu veiðiferð. Þorkell Pétursson, skipstjóri á Barða, segir í færslu á vef Síldarvinnslunnar að töluvert af loðnu hafi verið á miðunum suður af Mýrdalssandi.

„Aflinn fékkst í tveimur köstum við Alviðru. Við fengum 160 tonn í fyrra kastinu og um 1.100 tonn í því síðara. Við vorum nálægt landi og það var töluvert að sjá þarna í fjörunni. Þarna voru þéttar lóðningar sem gáfu vel. Þetta er fallegasta loðna, um 38 stykki í kílóinu og 16% hrognafylling,“ segir Þorkell.

Hann útskýrir að veiðarnar stjórnist af stöðunni í vinnslunni hverju sinni. „Við biðum á miðunum í um tvo daga áður en við gátum byrjað að veiða, en það var reyndar bræla annan daginn. Auðvitað vilja menn gera sem mest verðmæti úr loðnunni og þá þarf að veiða skynsamlega. Þetta var fyrsti nótatúr þessarar áhafnar á Barða og hann gekk eins og í sögu enda vanir kallar í hverju rúmi. Mér líst afskaplega vel á framhald loðnuvertíðarinnar. Það er einfaldlega ekki hægt að kvarta undan neinu.“

Barði landaði í Neskaupstað í morgun.

Tengdar fréttir

Loðnuveiðar

Brellin loðna og bjartsýni horfin

• Ný loðnuleit skilar enn lægra mati
• Ekki von á að mæling leiði til breytinga
• Áfram verður leitað að loðnunni
• „Það þarf auðvitað bara að leita betur“

» Fleiri tengdar fréttir

• Blogga um frétt