Gætu þurft að rífa glænýtt kerhús

Slökkt hefur verið í eldinum sem logaði í húsnæði Arctic Fish á Tálknafirði. Húsnæðið er verulega skemmt og kemur í ljós á næstu dögum hvort rífa þurfi húsið.

Davíð Rúnar Gunnarsson, slökkviliðsstjóri á Patreksfirði segir slökkvistarfið hafa gengið mjög vel en það hafi verið tæknilega krefjandi að komast að eldinum. Á endanum tókst að slökkva eldinn um klukkan 14.30.

Gastankar sprungu

„Þegar við komum á staðinn þá var aðalmálið að verja húsin í kring ásamt búnaði og dóti, það er að segja súrefniskútum, súrefnisframleiðslu, rafstöðvum, olíutönkum og öðru. Við náðum að verja þetta allt saman,“ segir Davíð í samtali við mbl.is.

Spurður hvort einhver hætta hafi skapast vegna tankanna sem hann nefnir segir hann svo ekki vera, að minnsta kosti ekki vegna sem staðsettir voru utandyra. Þónokkrir gastankar hafi þó sprungið inni í húsinu.

Hann segir slökkviliðinu hafa tekist að vernda tvö af þremur húsum á svæðinu en eldurinn kviknaði í húsinu í miðjunni. Aðeins séu litlar hitaskemmdir á ytra byrði húsana sem ekki kviknaði í. Starfsemi geti haldið áfram í þeim byggingum.

Frétt af mbl.is

Verja hús og tanka vegna sprengihættu

Bruni í húsnæði Arctic Fish á Tálknafirði. Ljósmynd/Friðbjörn Steinar Ottósson

Alvarleiki skemmda ekki enn ljós

Davíð segir erfitt að meta sem stendur hversu miklar skemmdirnar á húsinu eru eftir brunann. Þakið sé fallið að hluta og allar plastlagnir að eldiskerum hafi brunnið.

„Þetta verður mikið tjón, það er alveg ljóst. Við vitum ekki alveg hvernig er með lagnirnar undir húsinu, hvort að þær séu skemmdar. Það á eftir að skoða ástandið á þeim eftir einhverja daga og ef að þær eru skemmdar, þá þarf að rífa húsið,“ segir Davíð.

Þó að búið sé að slökkva eldinn er starfi á svæðinu ekki lokið. Slökkviliðið mun sinna kælingu á burðarvirki hússins og tiltekt fram eftir kvöldi.

Húsið sem kviknaði í var nýtt kerhús fiskeldisfyrirtækisins Arctic Fish sem átti að taka í notkun næstkomandi júnímánuð. Húsið var enn í byggingu og var fimm þúsund fermetrar að stærð.

Allt starfsfólk sem var við vinnu inni í húsinu þegar að eldurinn kviknaði náði að forða sér út en tveir voru fluttir á slysadeild með minniháttar meiðsl.

• Blogga um frétt